1991 йил, 29 декабрь
Ўзбекистондаги биринчи президент сайлови.
Собиқ коммунистик партия - Ўзбекистон Халқ демократик партиясидан Ислом Каримов ва мухолифатдаги “Эрк” демократик партиясидан Муҳаммад Солиҳ қатнашди.
Амалдаги президент Ислом Каримов 87,1 фоиз овоз билан сайловда ғалаба қозонгани эълон қилинди.
Сайловчиларнинг 12,5 фоизи Каримовнинг рақиби Муҳаммад Солиҳни қўллаб овоз берган.
«Эрк» партияси овоз бериш натижалари сохталаштирилганини айтади.
1995 йил, 26 март
Ислом Каримовнинг президентлик ваколати муддатини 4 йилга узайтириш бўйича умумхалқ референдуми бўлиб ўтди.
99,6 фоиз овоз билан амалдаги президент ваколати 2000 йилгача узайтирилди.
2000 йил, 9 январь
Амалдаги президент Ислом Каримов номзоди “Фидокорлар” миллий демократик партиясидан кўрсатилди. Сайловда Каримов 91,9 фоизи овоз олгани эълон қилинди. Унинг рақиби - Ўзбекистон Халқ демократик партияси номзоди Абдулҳафиз Жалолов 4,71 фоиз овоз олди. Унинг ўзи Ислом Каримовга овоз берганини айтди.
2002 йил
Умумхалқ референдумида президент ваколати муддати 7 йилга узайтирилди ва у амалдаги давлат раҳбари ваколат муддатига тадбиқ этилди.
2007 йил, 23 декабрь
Ўзбекистон конституцияси бир шахсга икки муддатдан кўп президент лавозимини эгаллашни тақиқласа-да, Ислом Каримов 88,1 фоизи овоз билан учинчи муддатга президент этиб сайланди.
4 номзод орасида биринчи аёл номзод – Дилором Тошмуҳамедова ҳам бор эди. У 2,9 фоизи овоз олгани эълон қилинди. Сайловда биринчи марта «ташаббус гуруҳи»дан қатнашган номзод Акмал Саидов 2,85 фоиз овоз олди.
2015 йил, 29 март
Ислом Каримовнинг навбатдаги президентлик ваколати 2014 йил декабрида ниҳоясига етди. Аммо президент сайлови 2015 йил мартига кўчирилди. Расмий сабаб – декабрга режаланган парламент сайловлари.
Тадбиркорлар ва ишбилармонлар ҳаракати – Ўзбекистон Либерал-демократик партиясидан номзод Ислом Каримов 90,39 фоиз овоз олгани эълон қилинди.
Унинг асосий рақиби – ХДП номзоди Ҳотамжон Кетмонов 2,92 фоиз олди.
2016 йил, 4 декабрь
Ислом Каримов ўлимидан кейинги биринчи президент сайлови.
Бош вазир ва вақтинча президент Шавкат Мирзиёев 87,73 фоиз овоз билан Ўзбекистоннинг иккинчи президенти этиб сайланди.
Қолган 3 номзод орасидан яна марҳум Каримовнинг собиқ рақиби Кетмонов энг кўп - 3,73 фоиз овоз олди.
Европалик кузатувчилар сайловда сиёсий рақобат муҳити кузатилмаганини қайд этган.
Сайловдан бир кун аввал Ўзбекистон Марказий сайлов комиссияси сайлов бюллетенини суратга олиб, ижтимоий тармоқларга жойлаш қатъиян тақиқланишини билдирган.
Комиссия баёнотига кўра, сайлов бюллетенини овоз бериб бўлгач суратга олиб ижтимоий тармоқларга жойлаштириш сайловнинг яширин овоз бериш принципини бузишни англатади.
МСК барча сайлов участкаларидаги овоз бериш кабиналарига суратга олишни тақиқлаш тўғрисидаги плакатлар жойлаштирилаётганини хабар қилган.
Жорий президент Шавкат Мирзиёев 2016 йил сентябрида Ислом Каримов ўлими ортидан вақтинча президент лавозимини эгаллаган ва ўша йилнинг декабрида қарийб 88 фоиз овоз билан президентликка сайланганди.
Ўзбекистон констутицияси бир шахсга 5 йилдан кетма-кет икки муддатга сайланиш ҳуқуқини беради.
Ўтмишда Ислом Каримов констутициядаги чекловга қарамасдан тўрт марта президентликка сайланган ва бир марта умумхалқ референдуми орқали президентлик ваколатларини узайтирган эди.
Иккинчи муддатга сайланиши кутилаётган Мирзиёев халқаро андозаларга мос, очиқ ва демократик сайловлар ўтказишга ваъда берган.
Аммо мухолиф ва мустақил номзодларнинг янги партияларни рўйхатдан ўтказиш ва сайловда қатнашиш уринишлари ҳукуматнинг қаттиқ қаршилигига учраган.
Сайлов арафасида мамлакат ичкарисидаги мустақил фаоллар куч ишлатар тизимларнинг ўзларига нисбатан босимлари кучайганини айтишган, бир неча фаол қаттиқ назоратга олинган, уларнинг ҳаракати чекланган.
Ўзбекистондаги президент сайловини кузатиш учун тўлақонли миссия юборган Европада хавфсизлик ва ҳамкорлик ташкилоти ўзининг оралиқ ҳисоботида сайловларда рақобат йўқлиги, сайловчилар ҳуқуқлари чеклангани ва мустақил номзодларни илгари суришга қўйилган тақиқ олиб ташланмаганини таъкидлаган.
Бу Ўзбекистонни чорак асрдан кўпроқ бошқарган Ислом Каримовнинг ўлимидан кейинги иккинчи президент сайлови ва Ўзбекистон тарихидаги олтинчи тўғридан-тўғри сайловдир.
Gazeta.uz нинг ўз мухбирларига таяниб хабар беришича, пойтахтдаги бир неча сайлов участкасида мухбирларнинг суратга олишидан “хурсанд бўлишмаган”.
Бундан ташқари, нашр 357 сайлов участкасида бир неча паспорт билан овоз беришга келганлар кузатилганини ёзмоқда.
Газетанинг ёзишича, Марказий сайлов комиссияси аъзолари уларнинг бошқалар учун овоз беришига рухсат беришмаган.
Амалдаги президент ва президентликка номзод Ш. Мирзиёев оиласининг 9 аъзоси билан бирга овоз берди.
Мирзиёевлар оиласи Тошкентнинг Мирзо Улуғбек туманидаги Алишер Навоий маҳалласида очилган 59-сайлов участкасига борди.
Бу участкада Мирзиёев ўзи билан бир вақтда бориб қолган сайловчиларга мулозамат кўрсатди ва бу ҳолат акс этган видео тармоқларда қўлма-қўл бўлиб кетди.
