O‘zbekiston xalq artisti, dublyaj san’ati ustasi To‘lqin Tojiyev 88 yoshida vafot etdi.
Ta’ziyanoma yoyinlagan O‘zbek milliy akademik drama teatri marhum aktyorni “o‘zbek dublyaj san’atining qiroli” deb atagan.
To‘lqin Tojiyev 1936-yil 13-aprelda Toshkent shahrida tug‘ilgan. 1959- yili Toshkent teatr va rassomlik institutining aktyorlik fakultetini tamomlab, uzoq yillar teatr, kino va dublyaj sohasida ijod qilgan.
Aktyor “Revizor”, “Hamlet”, “Qirol Lir”, “Otello”, “Alisher Navoiy”, “Mirzo Ulug‘bek” kabi spektakllarda, “Mahallada duv-duv gap”, “Alangali yillar”, “Besh og‘aynilar” kabi filmlarda rol ijro etgan.
To‘lqin Tojiyev mingdan ziyod badiiy filmni o‘zbek tiliga dublyaj qilishda qatnashgan. Xususan, “Ivan Vasilyevich kasbini o‘zgartiradi”, “Nofelet qayerda?”, “Avtomobildan saqlaning”, “Sadoqat”, “Fillar mening do‘stlarim”, “Ram va Sham” kabi badiiy filmlarga ovoz bergan.