Тошкент вилоят, Чиноз туманида яшовчи оила бошлиғи шу кунда 10 кунлик маъмурий қамоқ жазосини ўтамоқда. Унинг ўғли шу йилнинг апрелида 10 кунга қамалиб, 7 кун жазо ўтаб чиққан эди.
Ўғил устидан чиқарилган суд ҳукмига кўра, у ички ишлар органлари ходимининг қонуний талабларини бажармасликда, орган ходимларининг ўз хизмат бурчини бажаришига қаршилик кўрсатишда айбдор топилган.
Ўғилнинг айтишича, унинг отаси ҳам шундай айбловлар билан жазо ўтамоқда.
Расмий рўйхатдан ўтказилмаган “Ҳақиқат ва Тараққиёт” партияси лидери Хидирназар Аллақуловнинг иддао қилишича, ота-бола шу партия тарафдори бўлгани учун жазоланган.
29 яшар Аброр Отажоновнинг Озодликка айтишича, унинг отаси, 52 яшар Аҳрор Маҳмудовнинг қамалишига расман 9 июль куни Чиноз туман ИИБ биноси олдида бўлган воқеа сабаб бўлган.
Ота иши
8 июль куни ИИБга чақирилган маҳаллий блогер Зафар Саидаҳмедов уйига қайтмайди ва ўғлининг қайтмаганидан ташвишга тушган она -Шаҳло Жўрабекова ўша куни ИИБга бориб, ўғлининг дарагини топа олмайди.
“Эртаси куни мен ўзим, яқинларим билан яна ИИБ биноси олдига бордик. Биз билан Аҳрор ака ҳам борди. Дарвозасидан ичкарига киритишмади. Ўғлимни сўрай десам, биров чиқмади. Шунда ердан олхўридай иккита тош олиб, аввал темир дарвозага урдим. Кейин ичкарига отдим. Аҳрор ака бир четда турди. У киши бўлган воқеани видеога олди, холос. Кейин билсам, қамаб қўйишибди”, деди Озодликка Шаҳло Жўрабекова.
Блогер Зафар Саидаҳмедов, онаси Шаҳло Жўрабекованинг айтишича, молиявий пирамида қурган Аҳмадбой иши бўйича қўлга олинган. Бироқ бу ва Аҳрор Маҳмудов иши бўйича Чиноз туман ИИБдан маълумот олишнинг имкони бўлмади.
Шаҳло Жўрабекованинг иддао қилишича, унинг блогер ўғли ижтимоий тармоқлардаги танқидий чиқишлари учун жазоланмоқда.
Аброр Отажоновнинг Озодликка айтишича, отаси – Аҳрор Маҳмудов 15 июль куни “онлайн суд” қилинган ва Маъмурий жавобгарлик тўғрисидаги кодекснинг 183- (Майда безорилик), 194-(Ички ишлар органлари ходимининг қонуний талабларини бажармаслик) ва 195- (Ички ишлар органлари ходимларининг ўз хизмат бурчларини бажаришларига қаршилик кўрсатиш) моддалари бўйича айбдор топилиб, 10 суткага қамалган.
Шаҳло Жўрабекова суд мажлисида иштирок этган келинининг сўзларини келтиради:
“19 июль куни Аҳрор акани яна суд қилишди. Мен боролмадим. Лекин келиним борди. Келинимнинг айтишича, участковойимиз “Аҳрор Маҳмудов ИИБ олдига 30 кишини олиб бориб, забастовка қилди”, деган эмиш. Ёлғон бу. 30 киши эмас, 12 киши борганмиз. Тошниям мен отганман”.
Участка нозири Азамат (фамилиясини аниқлай олмадик) Озодлик қўнғироқларига жавоб бермади.
Отаси устидан 19 июлда апелляция суди ўтказилгани, суд дастлабки ҳукмни ўзгаришсиз қолдирганини Озодликка Аброр Отажонов ҳам айтди:
“Отам 10 суткага кесилган дастлабки суд бўлиб ўтган куни мен “Ҳақиқат Тараққиёт” партияси фаоллари билан Конституциявий судга ариза топшириш учун Тошкентда эдим. У ерда ҳам бизга ҳужум бўлди. Келсам, адамни қамаб қўйишган экан”.
Ўғил иши
Аброр Отажоновнинг ўзи шу йилнинг апрелида 7 сутка маъмурий жазо ўтаб чиққани маълум бўлди.
Жиноят ишлари бўйича Чиноз туман суди 23 апрелдаги мажлисида Аброр Отажонов ишини кўриб чиқиб, уни Маъмурий жавобгарлик тўғрисидаги кодекснинг 194-(Ички ишлар органлари ходимининг қонуний талабларини бажармаслик) ва 195- (Ички ишлар органлари ходимларининг ўз хизмат бурчларини бажаришларига қаршилик кўрсатиш) моддалари бўйича айбдор топган ва 10 суткага қамаган.
Суд қарорида айтилишича, Аброр Отажонов 21 апрель куни Чиноз туман, Сарбозор маҳалласидаги 29- ҳуқуқ-тартибот масканига кириб борган ва у ердаги вазиятни видеога олиб, Фейсбукка жойлаштирган. ИИБ ходимларининг талабларини бажармаган, қаршилик кўрсатган.
Аброр Отажоновнинг Озодликка айтишича, воқеа бундай кечган:
“21 апрель куни менга партияга (Ҳақиқат ва Тараққиёт партияси – таҳр.) имзо йиғаётганларни чақиришяптийкан, сен ҳам борасан экан, дейишди уйдагилар. Бормаса, куч ишлатиб олиб кетамиз, дейишибди. Бордим. Бориб Фейсбукда жонли эфир қила бошладим. Огоҳлантирганман жонли эфирда эканлигимни. Шунда телефонимни учасктковой телефонимни тортиб олиб қўйди. Қаршилик қилганим йўқ”.
Аброр Отажоновнинг айтишича, орадан 2 кун ўтгач, уни ИИБга чақиришган, у ердан судга олиб боришган, суд 10 суткага қамаган. Жазо муддатининг 7 куни уни яна суд қилишади:
“Нурафшонга олиб боришди жазо ўташ учун. Бир куни сендан тушунтириш хатлари олишимиз керак, деб чақиришди. Айтилган хонага кирдим. Қарасам, менинг суратимни партия аъзоси деб худди жиноятчилардай шкафларга ёпишитириб қўйишибди. Партияга алоқамни сўрашди. Эртаси куни яна бошқа бошлиқлар чақирди. Муддатимнинг 7- куни суд қилишди. Адвокатим айбсизлигимни исботлашга ҳаракат қилди. Кейин суд жазо муддати тугади, деди. Эртаси куни кечгача қарорни кутдим. Қарор келганидан кейин бўшатишди”.
Хидирназар Аллақулов: Тройка суди бўлди
Расмий рўйхатдан ўтказилмаган “Ҳақиқат ва Тараққиёт” партияси лидери Хидирназар Аллақуловнинг Аҳрор Маҳмудов ва унинг ўғли Аброр Отажоновлар ишидан хабардорлиги маълум бўлди:
“Кеча Аҳрор Маҳмудов устидан апелляция суди бўлиб ўтди. Суд ҳукми ўзгаришсиз қолдирилди. Кеча Озодбек Қурбоновнинг (партиянинг яна бир фаоли – таҳр.) ҳам апелляция суди бўлди. Уни 15 суткага қамоқда қолдирди. Суд ёпиқ ўтказилди. Судланувчилар судга олиб келинмади. Бизни эса, киритишмади. Суд бўлгани йўқ, Сталин давридаги Тройка суди бўлди”.
“Ҳақиқат ва Тараққиёт” партияси фаолларига босимлар бўлаётгани, улар қамоққа олинаётгани тўғрисида шу пайтгача бир неча марта хабар қилинган.
15 июль куни Президент Администрацияси биноси олдидан ушлаб кетилган мустақил блогер Озодбек Қурбонов майда безориликда айбланиб 15 суткага қамалди.
Бу ҳақда Озодликка маълум қилган “Ҳақиқат ва тараққиёт” партияси фаолларига кўра, судда блогер "ҳокимият вакилига қаршилик кўрсатгани" ва ходимларни "ҳақорат қилгани" айтилган.
Россияда Аллақулов тарафдорларининг имзосини тўплаган блогер Тошкентга келганидан сўнг ҳам партия фаолиятини ёритишда давом этган. Профессор Аллақуловнинг сўзларига кўра, у партиянинг интернет администратори сифатида фаолият олиб бораётганди.
Озодбек Қурбонов 12 июль куни Тошкентнинг Юнусобод тумани Мажбурий ижро бюроси ходимлари огоҳлантиришсиз Аллақуловнинг уйига келиб, уйдаги маиший жиҳозлар - телевизор, кир ювиш машинаси ва микротўлқинли печни мусодара қилгани тўғрисида биринчилардан бўлиб тармоқларда хабар тарқатганди.
Жорий йилнинг 21 июнь куни Адлия вазирлиги “талаб этилганидан қарийб 3 марта кам имзолар тақдим этилгани” важидан Аллақулов партиясини рўйхатдан ўтказишни рад этганди.
Партия фаоллари ўзларига нисбатан босимлар тўхтамаётганини айтмоқда.
Ўзбекистонда президент сайловлари шу йилнинг 24 октябрида бўлиб ўтади. Парламентдаги мавжуд беш партия раҳбарлари президентликка номзод бўладиган сайловларда кўпчилик амалдаги президент Шавкат Мирзиёевнинг иккинчи муддатга сайланишига шубҳа қилмайди.
2019 йил декабридаги парламент сайловларини кузатган ЕХҲТ миссияси Ўзбекистондаги нисбатан эркинлашган матбуот сиёсий мухолифатнинг ўрнини боса олмаганини айтган эди.
