Давлат Солиқ қўмитаси Тошкент шаҳри, Тошкент ва Фарғона вилоятларида метан гази нархи асоссиз оширилганини маълум қилди.
7 январь куни эълон қилинган расмий маълумотда айтилишича, 4 январь ҳолатига кўра, автомобилларга газ қуйиш шаҳобчаларида метан гази нархи 1900 сўмдан 2200 сўмга, пропан гази 200 сўмдан 500 сўмга қимматлаган.
Солиқ қўмитаси ўтказилган таҳлил нарх сунъий равишда оширилганини кўрсатган. Қўмитанинг ҳисоб-китобича, бугунги кунда метан газининг нархи 1800-1900 сўмдан ошмаслиги керак.
“Davlat soliq qoʻmitasi tomonidan tanlov asosida bir qancha metan gaz quyish shoxobchalarining faoliyati tahlil qilinganda, 2018 yilning 9 oyida 1 m3 metan gazning oʻrtacha narxi 1650 soʻmdan sotilgan boʻlsa, 4 chorakka kelib 1950 soʻmgacha oshirilgan. Joriy yildan boshlab esa hech qanday asossiz ravishda 1900 soʻmdan oshirilib, 2200 soʻmgacha sotilmoqda.
Natijada gaz quyish shoxobchalarining rentabellik darajasi 2018 yilning 9 oyligidagi 20-29 foizdan 45-60 foizgacha oshgan. Agar ushbu shoxobchaning rentabellik darajasi 30-36 foiz miqdorida saqlangan holatda narx 1800-1900 soʻmdan oshmasligi kerak edi”, дейилади расмий маълумотда.
Қўмита газ нархини асоссиз оширган тадбиркорлар фаолияти алоҳида назоратга олинишини билдирган.
Аввалроқ Молия вазирлиги нархни асосиз оширган автомобилларга газ қуйиш шаҳобчалари эгаларига нисбатан чоралар кўришини маълум қилган эди.
